யாழ்ப்பாண நகரை அண்டிய பிரதான வீதியில் காட்சிப்படுத்தப்பட்டிருந்த நாடாளுமன்ற உறுப்பினர் அர்ச்சுனா இராமநாதனின் 10 அடி உயர பதாகை (Cut-out) ஒன்றுக்கு இனந்தெரியாத நபர்களால் செருப்பு மாலை அணிவிக்கப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.
பின்னணி மற்றும் குற்றச்சாட்டுக்கள்:
யாழ்ப்பாணத்தில் அண்மைக்காலமாக நடைபெறும் பல்வேறு ஒருங்கிணைப்பு குழு கூட்டங்களில், அர்ச்சுனா இராமநாதன் தகாத வார்த்தைப் பிரயோகங்களை மேற்கொண்டு வருவதாகவும், சபை நாகரீகமின்றி நடந்துகொண்டு கூட்டங்களை திட்டமிட்டு குழப்பி வருவதாகவும் பொதுமக்கள் மற்றும் அரசியல் தரப்பினர் மத்தியில் பரவலாகக் குற்றச்சாட்டுக்கள் முன்வைக்கப்பட்டு வருகின்றன.
சமூக ஊடகங்களில் வெளியான காணொளி:
இதன் தொடர்ச்சியாக, நேற்று (18) நடைபெற்ற தெல்லிப்பளை பிரதேச ஒருங்கிணைப்பு குழு கூட்டத்திலும் அவர் கலந்துகொண்டிருந்தார். இதன்போது அவர் மிக மோசமான வார்த்தைப் பிரயோகங்களைப் பயன்படுத்தி, சபையில் இருந்தவர்களுடன் வாக்குவாதத்தில் ஈடுபட்டதாகக் கூறப்படுகிறது.
இது தொடர்பான காணொளிகள் (Videos) சமூக ஊடகங்களில் வெளியாகி, பொதுமக்கள் மத்தியில் கடும் விமர்சனங்களையும் கண்டனங்களையும் தோற்றுவித்துள்ளது.
இந்த நிலையில், அவரது இத்தகைய நாடாளுமன்ற மற்றும் சபை நாகரீகமற்ற நடத்தைக்கு எதிர்ப்பு தெரிவிக்கும் வகையிலேயே, பொது வீதியில் வைக்கப்பட்டிருந்த அவரது பிரம்மாண்ட பதாகைக்கு செருப்பு மாலை அணிவிக்கப்பட்டிருக்கலாம் என சந்தேகிக்கப்படுகிறது. இச்சம்பவம் யாழ். அரசியல் வட்டாரத்தில் தற்போதைய பேசுபொருளாக மாறியுள்ளது.
