தமிழ் சினிமாவில் மாபெரும் வெற்றி பெற்று, தேசிய விருதுகளையும் குவித்து வசூலில் சாதனை படைத்த நடிகர் தனுஷ் – இயக்குநர் வெற்றிமாறன் கூட்டணியின் ‘அசுரன்’ திரைப்படம் வெளியாகி 7 ஆண்டுகளை நிறைவு செய்துள்ளது.
எழுத்தாளர் பூமணியின் ‘வெக்கை’ நாவலைத் தழுவி உருவான இத்திரைப்படம், சாதிய ஒடுக்குமுறைகளுக்கு எதிராகப் போராடும் சிவசாமி என்ற கதாபாத்திரத்தின் மூலம் சமூகத்தில் மிகப்பெரிய தாக்கத்தை ஏற்படுத்தியது. குறிப்பாக, இப்படத்தில் இடம்பெற்ற ‘படிப்பை மட்டும் யாராலும் நம்மகிட்ட இருந்து பறிக்கவே முடியாது சிதம்பரம்’ என்ற புகழ்பெற்ற வசனம் இன்றளவும் ரசிகர்களின் இதயங்களில் நீங்காத இடம்பிடித்துள்ளது.
இந்த காவியத் திரைப்படம் வெளியாகி 7 ஆண்டுகள் நிறைவடைந்ததையொட்டி, சமூக வலைதளங்களில் ரசிகர்கள் மற்றும் சினிமா பிரபலங்கள் பலரும் தங்களது மகிழ்ச்சியைப் பகிர்ந்து அசுரன் படத்தைக் கொண்டாடி வருகின்றனர்.