எதிர்க்கட்சியின் பலவீனமும் ஆதரவற்ற நிலையும் அவர்கள் முன்னெடுக்கும் ஆர்ப்பாட்டங்கள் மூலமாகவே வெளிப்படுவதாக பொது நிர்வாக, மாகாண சபைகள் மற்றும் உள்ளூராட்சி மன்றங்கள் அமைச்சர் பேராசிரியர் சந்தன அபேரத்ன இன்றைய தினம் (24) கொழும்பில் ஊடகங்களுக்குக் கருத்துத் தெரிவிக்கும் போது குறிப்பிட்டுள்ளார்.
அரசியலமைப்பின் 22ஆவது திருத்தம் குறித்து நீதிமன்றம் வழங்கிய தீர்ப்பை சவாலுக்கு உட்படுத்துவது ஒரு பாரதூரமான விடயம் என்பதால், அது எந்தளவிற்கு நியாயமானது என்பதை எதிர்க்கட்சித் தலைவர் உணர்ந்து கொள்ள வேண்டும் என்றும், நீதிமன்றத் தீர்ப்பிற்கு அமையவே நாடாளுமன்றத்தினுள் 22ஆவது திருத்தம் தொடர்பான அடுத்தகட்ட நடவடிக்கைகள் முன்னெடுக்கப்படும் என்றும் அமைச்சர் சுட்டிக்காட்டினார்.
கடந்த இரண்டு ஆண்டுகளில் போராட்டக்காரர்கள் மீது அரசாங்கம் கண்ணீர்ப்புகைப் பிரயோகத்தைப் பயன்படுத்தவில்லை எனக் குறிப்பிட்ட அவர், ஜனநாயக முறையில் போராட்டம் நடத்துவதற்கு எவருக்கும் உரிமை உண்டு என்பதால் அதில் தலையிடப்போவதில்லை எனக் கூறினார்.
எதிர்க்கட்சியினர் தங்களது போராட்டங்களை நடத்தட்டும், நாங்கள் நாட்டின் அபிவிருத்திப் பணிகளைத் தொடர்ந்து முன்னெடுப்போம் எனக் கூறிய அமைச்சர், அரசின் அனைத்து நடவடிக்கைகளுக்கும் எதிர்ப்பைப் தெரிவிப்பது எதிர்க்கட்சியின் வேலையல்ல என்றும், நல்ல திட்டங்களுக்கு ஆதரவளிப்பதே அவர்களின் பொறுப்பு என்றும் வலியுறுத்தினார்.
மேலும், கடந்த ஆண்டை விட இவ்வருட வரவு செலவுத் திட்டத்தில் அரச சேவையை திறமையாகவும் பரந்த அளவிலும் விரிவுபடுத்தும் நோக்கில் 1,20,000 பேரை புதிதாக இணைத்துக் கொள்வதற்கு நிதி ஒதுக்கீடுகள் செய்யப்பட்டுள்ளதாகத் தெரிவித்தார். அத்துடன், அரச சேவையின் சிக்கல்கள் தொடர்பில் பொதுமக்களின் கருத்துக்களைப் பெற்றுக்கொள்வதற்கான சிறப்பு வேலைத்திட்டமும் தற்போது நடைமுறைப்படுத்தப்பட்டு வருகின்றது.
ஜனாதிபதியின் வழிகாட்டலின் கீழ் வீழ்ச்சியடைந்திருந்த நாட்டை கடந்த இரண்டு ஆண்டுகளில் மீளக்கட்டி எழுப்புவதற்கு மிகப்பெரிய பங்கை ஆற்றியுள்ளதாகத் தெரிவித்த அவர், உயிர்த்த ஞாயிறு தாக்குதல் தொடர்பில் சிலர் தண்டனை பெற்றுள்ள போதிலும், இச்சம்பவத்துடன் தொடர்புடைய மேலும் பலர் இருப்பார்களாயின் அவர்களுக்கும் தகுந்த தண்டனை கிடைக்கப் பெற வேண்டும் என்பதில் அரசாங்கம் உறுதியாக உள்ளதாகத் தெரிவித்தார்.