எல் நினோ காலநிலை தாக்கத்தால் ஏற்பட்டுள்ள வறட்சி நிலைமையை முன்னிட்டு, மொனராகலை மாவட்ட மக்களுக்கு குடிநீர் மற்றும் அத்தியாவசிய தேவைகளுக்கான நீரை இடையறாது வழங்க தேவையான நடவடிக்கைகள் முன்னெடுக்கப்பட்டு வருவதாக தெரிவிக்கப்பட்டுள்ளது.
இந்த விடயத்தை வர்த்தகம், வாணிபம் மற்றும் உணவுப் பாதுகாப்பு பிரதி அமைச்சர் மற்றும் மொனராகலை மாவட்ட ஒருங்கிணைப்புக் குழுத் தலைவர் ஆர். எம். ஜயவர்தன தெரிவித்துள்ளார்.
மேலும், அந்தப் பகுதியில் நீண்டகாலமாக நிலவி வரும் நீர்ப்பற்றாக்குறைக்கு நிரந்தரத் தீர்வாக கும்புக்கன் ஓயா (Kumbukkan Oya) நீர்த்தேக்கத் திட்டத்தை விரைவாக நடைமுறைப்படுத்துவது அரசின் முக்கிய நோக்கமாக இருப்பதாகவும் அவர் குறிப்பிட்டார்.
காலநிலை மாற்றம் மற்றும் நீடித்த வறட்சி காரணமாக ஏற்படக்கூடிய நீர்ப்பற்றாக்குறையை சமாளிக்கும் வகையில், சம்பந்தப்பட்ட அதிகாரிகளுடன் இணைந்து தேவையான முன்னெச்சரிக்கை மற்றும் நிவாரண நடவடிக்கைகள் மேற்கொள்ளப்பட்டு வருவதாகவும் பிரதி அமைச்சர் மேலும் தெரிவித்துள்ளார்.