இன்றைய தினம் (25) கொழும்பில் நடைபெற்ற பொலிஸ் ஊடக சந்திப்பிலேயே காவல்துறை உதவி கண்காணிப்பாளரும் பொலிஸ் ஊடகப்பேச்சாளருமான , சட்டத்தரணி எஃப். யூ. வூட்லர் அவர்கள் இதனைத் தெரிவித்தார்.
துபாயில் வைத்து கைது செய்யப்பட்ட இலங்கையின் பல தீவிர குற்றங்களுடன் தொடர்புடைய 36 வயதுடைய முக்கிய சந்தேகநபர் ஒருவர், இலங்கை காவல்துறை மற்றும் குற்றப் புலனாய்வுத் துறையினரால் நாட்டிற்கு அழைத்து வரப்பட்டுள்ளார்.
களுத்துறை தெற்கு பகுதியைச் சேர்ந்த இந்த சந்தேகநபர், துபாய் பொலிஸாரால் கைது செய்யப்பட்டு தடுத்து வைக்கப்பட்டிருந்தார். இலங்கையின் பொலிஸ் மா அதிபருக்குக் கிடைத்த சிறப்புத் தகவலின் அடிப்படையில், குற்றப் புலனாய்வுத் துறை (CID), தேசிய புலனாய்வுச் சேவை (SIS) மற்றும் மத்திய குற்றப் புலனாய்வுப் பிரிவின் அதிகாரிகள் இணைந்து 2025 அக்டோபரில் மேற்கொண்ட திட்டமிட்ட நடவடிக்கையின் மூலம் இவர் கைது செய்யப்பட்டார்.
இரு நாடுகளுக்கிடையிலான சட்ட ஒப்பந்தங்கள், புரிந்துணர்வு உடன்படிக்கைகள், வெளியுறவு அமைச்சு மற்றும் சட்டமா அதிபர் திணைக்களத்தின் ஒருங்கிணைந்த ஒத்துழைப்புடன் இவர் இலங்கைக்கு அழைத்து வரப்பட்டுள்ளார். தற்போது இவர் மத்திய குற்றப் புலனாய்வுப் பிரிவின் தடுப்புக் காவலில் வைக்கப்பட்டு மேலதிக விசாரணைகள் முன்னெடுக்கப்பட்டு வருகின்றன.
கைது செய்யப்பட்டுள்ள சந்தேகநபர் மீது துப்பாக்கிச் சூடு சம்பவங்கள், கொலைகள், துப்பாக்கிகளைப் பயன்படுத்தி மேற்கொள்ளப்பட்ட கொலை முயற்சிகள், தீவிர காயங்களை ஏற்படுத்தியமை, கப்பம் கோரியமை, ஆயுதங்களைப் பயன்படுத்தி தாக்குதல் நடத்தியமை மற்றும் வாகனங்கள், சொத்துக்களுக்கு தீ வைக்கப்பட்ட சம்பவங்கள் போன்ற பல தீவிர குற்றங்கள் தொடர்பாக வழக்குகள் மற்றும் விசாரணைகள் நிலுவையில் உள்ளன.
வெளிநாடுகளில் தலைமறைவாக இருந்து கொண்டு இலங்கையில் குற்றங்களை இயக்கி வரும் நபர்களைக் கைது செய்ய காவல்துறை தீவிர நடவடிக்கை எடுத்து வருகிறது.
இதன் கீழ் 2024 – 2026 காலப்பகுதியில் சிவப்பு எச்சரிக்கை (Red Notice) பிறப்பிக்கப்பட்ட 42 குற்றவாளிகள் இதுவரை நாட்டிற்கு அழைத்து வரப்பட்டுள்ளனர். மேலும் 109 பேருக்கு சிவப்பு எச்சரிக்கை பிறப்பிக்கப்பட்டு, அடுத்த 2-3 ஆண்டுகளில் அவர்களை நாட்டிற்கு அழைத்து வர நடவடிக்கைகள் எடுக்கப்பட்டு வருகின்றன.
சர்வதேச பொலிஸ் (Interpol) சிவப்பு எச்சரிக்கை இல்லாத போதிலும், இருநாட்டு பொலிஸ் மா அதிபர்களின் பரஸ்பர நம்பிக்கை மற்றும் ராஜதந்திர உறவுகளின் அடிப்படையில் 38 சந்தேகநபர்கள் இலங்கைக்குக் கொண்டுவரப்பட்டுள்ளனர்.
அத்துடன், குற்றவாளிகள் சட்டவிரோதமான முறையில் ஈட்டிய சொத்துக்களை அரசுடமையாக்கும் நடவடிக்கைகளும் துரிதப்படுத்தப்பட்டுள்ளன. 2024 ஆம் ஆண்டில் 1,549 மில்லியன் ரூபாய் மதிப்புள்ள சொத்துக்களும், 2025 ஆம் ஆண்டில் 1,549 மில்லியன் ரூபாய் மதிப்புள்ள சொத்துக்களும், 2026 ஆம் ஆண்டின் இதுவரையிலான மாதங்களில் 839 மில்லியன் ரூபாய் மதிப்புள்ள சொத்துக்களும் அடையாளம் காணப்பட்டுள்ளன.
அதன்படி, கடந்த 3 ஆண்டுகளில் மொத்தம் 3,878 மில்லியன் ரூபாய் மதிப்பிலான தங்கம், சொகுசு வீடுகள், நிலங்கள், வாகனங்கள் மற்றும் பண சொத்துக்களை அரசுடமையாக்க முதற்கட்ட சட்ட நடவடிக்கைகள் எடுக்கப்பட்டுள்ளன.
மேலும், 2025 அக்டோபர் முதல் நாட்டில் தீவிரப்படுத்தப்பட்டுள்ள குற்றத் தடுப்பு சோதனைகளுக்கு பொதுமக்கள் அளித்து வரும் ஒத்துழைப்புக்கு நன்றி தெரிவிக்கப்பட்டுள்ளது. உள்நாட்டிலோ அல்லது வெளிநாட்டிலோ இருக்கும் எந்தவொரு குற்றவாளி அல்லது சட்டவிரோத நடவடிக்கைகள் குறித்து தகவல் தெரிவிக்க 1818 என்ற சிறப்பு தொலைபேசி இலக்கத்தை தொடர்பு கொள்ளுமாறு பொதுமக்கள் கேட்டுக்கொள்ளப்படுகிறார்கள்.
தகவல்களை வழங்குபவர்களின் இரகசியம் பாதுகாக்கப்படும் எனவும் காவல்துறை உறுதி அளித்துள்ளது.