கொழும்பு:டீசல் விலை குறைக்கப்பட்டாலும் கூட, அடுத்த 6 மாதங்களுக்கு பஸ் கட்டணங்களில் எவ்வித மாற்றமும் செய்யப்பட மாட்டாது என இலங்கை தனியார் பஸ் உரிமையாளர்கள் சங்கத்தின் தலைவர் கெமுனு விஜேரத்ன திட்டவட்டமாகத் தெரிவித்துள்ளார்.
கொழும்பில் இன்று (21) நடைபெற்ற செய்தியாளர் சந்திப்பில் அவர் வெளியிட்ட முக்கிய தகவல்கள்:
கட்டண திருத்த ஆலோசனைகள்: வருடாந்த பஸ் கட்டண திருத்தத்தை எதிர்வரும் ஜூலை 3ஆம் திகதி மேற்கொள்வது குறித்து ஆலோசிக்கப்பட்டு வருகிறது. மாத இறுதியில் வெளியாகும் எரிபொருள் விலை சூத்திரத்தின் அடிப்படையிலேயே இது தீர்மானிக்கப்படும்.
6 மாதங்களுக்கு மாற்றமில்லை: ஜூலை மாத திருத்தத்திற்கு முன்னரோ அல்லது பின்னரோ டீசல் விலை குறைக்கப்பட்டாலும், அடுத்த 6 மாதங்களுக்கு பஸ் கட்டணம் குறைக்கப்பட மாட்டாது.
பஸ் சங்கத்திற்கு நட்டம்: ஜூன் 1ஆம் திகதி முதல் இதுவரை தனியார் பஸ் போக்குவரத்துத் துறைக்கு நாளொன்றுக்கு 25 ரூபாய் வீதம், மொத்தம் 60 கோடி ரூபாய் நட்டம் ஏற்பட்டுள்ளது.
ஒப்பந்தத்தில் சட்டமில்லை: டீசல் விலை குறைந்தால் பஸ் கட்டணத்தைக் குறைக்க வேண்டும் என தேசிய போக்குவரத்து ஆணைக்குழுவுடனான ஒப்பந்தத்தில் எங்கும் குறிப்பிடப்படவில்லை. இதுவரை புரிந்துணர்வின் அடிப்படையிலேயே அது செய்யப்பட்டது. இனி அவ்வாறு செய்ய முடியாது, தேவையெனில் எம்மீது வழக்கு தொடரலாம் என சவால் விடுத்துள்ளார்.