சாய்ந்தமருது: வீதி பொது போக்குவரத்து சட்டங்களை மீறிய குற்றச்சாட்டின் அடிப்படையில், சாய்ந்தமருது நகர் மற்றும் புறநகர்ப் பகுதிகளில் இன்று (20) மேற்கொள்ளப்பட்ட விசேட சுற்றிவளைப்பு நடவடிக்கையின் போது 33க்கும் மேற்பட்ட மோட்டார் சைக்கிள்கள் பொலிஸாரால் கைப்பற்றப்பட்டுள்ளன.
சாய்ந்தமருது பொலிஸ் நிலையப் பொறுப்பதிகாரிக்குக் கிடைத்த முறைப்பாடுகளுக்கு அமைவாகவே இந்த அதிரடி சோதனை நடவடிக்கை முன்னெடுக்கப்பட்டது.
கண்டறியப்பட்ட முக்கிய விதிமீறல்கள்:
சுற்றிவளைப்பின் போது பின்வரும் போக்குவரத்து விதிமீறல்களில் ஈடுபட்ட சந்தேக நபர்கள் மற்றும் மோட்டார் சைக்கிள்கள் சட்ட நடவடிக்கைக்கு உட்படுத்தப்பட்டுள்ளன:
-
வாகன ஆவணங்கள் மற்றும் காப்புறுதி (Insurance) இன்றி பயணித்தமை.
-
சாரதி அனுமதிப்பத்திரம் (Driving License) இன்றி வாகனம் செலுத்தியமை.
-
தலைக்கவசம் (Helmet) அணியாது சென்றமை.
-
ஒரு மோட்டார் சைக்கிளில் இருவருக்கு மேற்பட்டவர்கள் (Overloading) பயணித்தமை.
-
அதிவேகமாக மோட்டார் சைக்கிள்களை செலுத்தியமை.
-
அதிக சத்தத்தை எழுப்பக்கூடிய வகையில் மோட்டார் சைக்கிள்களை மாற்றியமைத்து பயணித்தமை.
உயர் அதிகாரிகளின் வழிகாட்டுதல்:
கிழக்குப் பிராந்தியத்துக்குப் பொறுப்பான சிரேஷ்ட பிரதிப் பொலிஸ் மா அதிபர் சட்டத்தரணி வருண ஜெயசுந்தரவின் உத்தரவின் பேரில், அம்பாறை பிரிவுக்குப் பொறுப்பான பிரதி பொலிஸ் மா அதிபர் சுஜித் வேதமுல்லவின் பணிப்புரைக்கமைய இந்த நடவடிக்கை முன்னெடுக்கப்பட்டது.
மேலும், சிரேஷ்ட பொலிஸ் அத்தியட்சகர் பிரியந்த பண்டார கஸ்தூரியாராச்சியின் நெறிப்படுத்தலில், கல்முனை பிராந்திய உதவி பொலிஸ் அத்தியட்சகர் எம்.கே.இப்னு அசாரின் வழிகாட்டுதலின் கீழ், சாய்ந்தமருது பொலிஸ் நிலைய பொறுப்பதிகாரி பொலிஸ் பரிசோதகர் டி.எஸ்.இந்திக தலைமையில் இந்த விசேட சுற்றிவளைப்பு வெற்றிகரமாக நடத்தப்பட்டது.
பொலிஸாரின் நடவடிக்கை:
கைப்பற்றப்பட்ட மோட்டார் சைக்கிள்கள் மற்றும் சான்றுப் பொருட்கள் மேலதிக சட்ட நடவடிக்கைகளுக்காக சாய்ந்தமருது பொலிஸ் நிலையத்திற்கு எடுத்துச் செல்லப்பட்டு, தற்போது தீவிர சோதனைக்கு உட்படுத்தப்பட்டு வருகின்றன.
முக்கிய குறிப்பு: பிடிபட்ட மோட்டார் சைக்கிள்களின் உரிமையாளர்களுக்கு, சாய்ந்தமருது பொலிஸ் நிலைய பொறுப்பதிகாரியினால் கடுமையான எச்சரிக்கையுடன் கூடிய அறிவுரைகளும் இதன்போது வழங்கப்பட்டன.
இவ்விசேட சுற்றிவளைப்பு நடவடிக்கையில் சாய்ந்தமருது பொலிஸ் நிலையத்தின் பல்வேறு பிரிவுகளையும் சேர்ந்த பெருமளவிலான பொலிஸ் உத்தியோகத்தர்கள் கடமையில் ஈடுபடுத்தப்பட்டிருந்தமை குறிப்பிடத்தக்கது.