12ஆவது சர்வதேச யோகா தினத்தை முன்னிட்டு, இலங்கையிலுள்ள இந்திய உயர்ஸ்தானிகராலயம் ஏற்பாடு செய்திருந்த பிரதான யோகா நிகழ்வு இன்று காலை கொழும்பு சுதந்திர சதுக்க வளாகத்தில் மிக விமரிசையாக நடைபெற்றது.
இந்த ஆண்டு சர்வதேச யோகா தினமானது “ஆரோக்கியமான முதுமைக்கான யோகா” (Yoga for Healthy Ageing) எனும் தொனிப்பொருளின் கீழ் உலகளவில் கடைப்பிடிக்கப்படுகிறது. சமநிலை மற்றும் விழிப்புணர்வுடன் கூடிய வாழ்வின் மூலம் ஆரோக்கியமான முதுமையை எட்டுவதில் யோகாசனத்தின் பங்கினை வலியுறுத்தும் வகையிலேயே கொழும்பில் இந்நிகழ்வு பிரம்மாண்டமாக ஏற்பாடு செய்யப்பட்டிருந்தது.
இந்திய உயர்ஸ்தானிகராலயத்தின் அழைப்பின் பேரில் இந்த நிகழ்வில் இலங்கையின் முக்கிய அரசியல் தலைவர்கள், இராஜதந்திரிகள் மற்றும் யோகா ஆர்வலர்கள் பலர் கலந்துகொண்டனர்.
குறிப்பாக கௌரவ அமைச்சர் கிரிஷாந்த அபேசேன, பிரதி சபாநாயகர் ரிஸ்வி சாலிஹ், பிரதி அமைச்சர்களான பிரதீப் சுந்தரலிங்கம் மற்றும் நிஷாந்த ஜயவீர ஆகியோருடன் பாராளுமன்ற உறுப்பினர்கள் மற்றும் தூதரக அதிகாரிகள் பலரும் இதில் முன்னிலை வகித்தனர்.
அதிகாலை வேளையிலேயே கொழும்பு சுதந்திர சதுக்க வளாகத்தில் நூற்றுக்கணக்கான யோகா ஆர்வலர்கள், இளைஞர்கள் மற்றும் பொதுமக்கள் எனப் பலரும் உற்சாகத்துடன் திரண்டிருந்தனர்.
நிகழ்வில் கலந்துகொண்ட அமைச்சர்கள் மற்றும் பிரதிநிதிகள், பொதுவான யோகா நெறிமுறைகளின்படி அமைக்கப்பட்ட எளிய ஆசனங்கள், மூச்சுப்பயிற்சிகள் (பிராணாயாமம்) மற்றும் தியான அமர்வுகளில் பொதுமக்களுடன் இணைந்து ஆர்வத்துடன் பங்கேற்றனர்.
உடலுக்கும் மனதுக்கும் இடையிலான ஆரோக்கியமான இணைப்பை யோகா எவ்வாறு பலப்படுத்துகிறது என்பதை இப்பயிற்சிகள் மூலமாகப் பங்கேற்பாளர்கள் நேரடியாக அனுபவித்தனர்.
இந்நிகழ்வு குறித்து கருத்து பகிர்ந்துள்ள இந்திய உயர்ஸ்தானிகராலயம், ஆரோக்கியமான முதுமைக்கான யோகா என்ற கருப்பொருளின் கீழ், ஆரோக்கியம், சமநிலை மற்றும் விழிப்புணர்வுடன் கூடிய வாழ்க்கையை நோக்கிய பயணமாக 12ஆவது சர்வதேச யோகா தினத்தை கொழும்பு சுதந்திர சதுக்கத்தில் கொண்டாடுவதில் பெருமகிழ்ச்சி அடைவதாகத் தெரிவித்துள்ளது.
இலங்கை மற்றும் இந்தியாவுக்கு இடையிலான கலாசார உறவுகளை மேலும் பலப்படுத்தும் ஒரு பாலமாக அமைந்த இந்த யோகா தின நிகழ்வு, ஆரோக்கியமான வாழ்வியலை நோக்கிய விழிப்புணர்வையும் கொழும்பு மக்களிடையே பரவலாக ஏற்படுத்தியுள்ளது.
