ஏமனில் செயல்பட்டு வரும் ஈரான் ஆதரவு ஹூதி அமைப்பினர், அந்நாட்டின் செங்கடல் பகுதியில் உள்ள மிக முக்கியமான மொகா (Mocha) துறைமுக நகரை மற்றும் ஹனிஷ், பெரிம் (Perim) தீவுகளைக் கைப்பற்றி பெரும் முன்னேற்றம் கண்டுள்ளதாகத் தகவல்கள் வெளியாகியுள்ளன.
செங்கடலின் தெற்குப் பகுதியில் உள்ள சர்வதேசக் கப்பல் போக்குவரத்திற்கு மிக முக்கியமான ‘பாப் அல்-மந்தேப்’ (Bab el-Mandeb) நீரிணைக்கு அருகில் அமைந்துள்ள மொகா துறைமுகத்தை ஹூதி படையினர் கைப்பற்றியுள்ளனர்.
மேலும் அப்பகுதியில் உள்ள ஹனிஷ் மற்றும் பெரிம் தீவுகளையும் அவர்கள் தங்கள் கட்டுப்பாட்டுக்குள் கொண்டுவந்துள்ளதாக அரசுத் தரப்பு வட்டாரங்கள் தெரிவித்துள்ளன.
உலகின் பெரும்பாலான கச்சா எண்ணெய் மற்றும் வணிகக் கப்பல்கள் பயணிக்கும் இந்த முக்கிய கடல் வழியில் ஹூதிகளின் கை ஓங்கியிருப்பது, உலகளாவிய வர்த்தகம் மற்றும் எரிபொருள் விநியோகத்திற்குப் பெரிய அச்சுறுத்தலாக மாறியுள்ளது.
சவூதி அரேபியாவின் ஆதரவு பெற்ற ஏமன் அரசுக் படைகள் அங்கிருந்து பின்வாங்கி, பாதுகாப்புக்காகத் தெற்கு நோக்கி நகர்ந்துள்ளதாகத் தெரிவிக்கப்பட்டுள்ளது.
சர்வதேசக் கப்பல் போக்குவரத்திற்குத் தங்களால் எந்த ஆபத்தும் இல்லை என்றும், தங்கள் மீதான தாக்குதல்கள் நிறுத்தப்பட்டால் தாங்களும் தாக்குதலை நிறுத்துவோம் என்றும் ஹூதி அமைப்பின் செய்தித் தொடர்பாளர் தெரிவித்துள்ளார்.