திட்டமிடப்பட்டுள்ள மின்சார இரயில் திட்டத்திற்கு பெருமளவிலான மின்சாரம் தேவைப்படும் என போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க பாராளுமன்றத்தில் தெரிவித்துள்ளார்.
இது தொடர்பாக இன்று பாராளுமன்றத்தில் உரையாற்றிய அமைச்சர் பிமல் ரத்நாயக்க, இந்த இரயில் திட்டம் நாட்டின் எதிர்கால மிகப்பெரிய மின் நுகர்வோர்களில் ஒன்றாக மாறும் எனக் குறிப்பிட்டார்.
இதற்குத் தேவையான அதிகளவிலான மின்சாரத்தைப் பெற்றுக்கொள்வது குறித்து சக்தி அமைச்சுடன் பேச்சுவார்த்தைகள் முன்னெடுக்கப்பட்டு வருவதாக அவர் தெரிவித்தார்.
மேலும், நாட்டில் உற்பத்தி செய்யப்படும் அதிகளவிலான மின்சாரத்தைப் பயன்படுத்தக்கூடிய முக்கிய திட்டங்களில் ஒன்றாக இந்த மின்சார இரயில் திட்டம் அடையாளம் காணப்பட்டுள்ளதாகவும் அவர் கூறினார்.
நாட்டில் அதிகரிக்கப்படும் மின் உற்பத்தியைப் பயன்படுத்துவதற்கு ஏற்ற தொழிற்சாலைகள் மற்றும் திட்டங்களை உருவாக்க வேண்டும் என்றும், இல்லையெனில் மேலதிக மின்சாரத்தை ஏற்றுமதி செய்ய வேண்டியிருக்கும் என்றும் அமைச்சர் சுட்டிக்காட்டினார்.
அத்துடன், மின்சார இரயில் போன்ற பிரமாண்ட திட்டங்களுக்குத் தேவையான ஆற்றலைப் பெற புதுப்பிக்கத்தக்க சக்தி (Renewable Energy) மூலங்களைப் பயன்படுத்துவதில் அரசாங்கம் கவனம் செலுத்தி வருவதாகவும் அவர் தெரிவித்தார்.