அமெரிக்காவில் சிஎன்என் (CNN), எம்எஸ் நவ் (MS Now – முன்பு எம்.எஸ்.என்.பி.சி) மற்றும் பொலிட்டிகோ (Politico) ஆகிய முன்னணி ஊடக நிறுவனங்கள் வெள்ளை மாளிகைக்குள் (White House) நுழைய தடை விதிக்கப்பட்டதை எதிர்த்து, அமெரிக்க பெடரல் நீதிமன்றத்தில் கூட்டாக வழக்கு தொடுத்துள்ளன.
அமெரிக்க ஜனாதிபதி டொனால்ட் ட்ரம்பின் நிர்வாகம் தங்களைப் பற்றி தொடர்ந்து “தவறான மற்றும் பக்கச்சார்பான” செய்திகளை வெளியிடுவதாகக் குற்றம்சாட்டி, இந்த மூன்று ஊடக நிறுவனங்களையும் வெள்ளை மாளிகைத் செய்தியாளர் கூடத்திற்குள் நுழைய தடை விதித்தது.
மேலும், கடந்த வார இறுதியில் சம்பந்தப்பட்ட செய்தியாளர்களின் அனுமதி அட்டைகள் (Press Passes) முடக்கப்பட்டன.
இதனைத் தொடர்ந்து, அமெரிக்க அரசியலமைப்பின் முதல் திருத்தச் சட்டம் (First Amendment – பேச்சு மற்றும் ஊடக சுதந்திரம்) மற்றும் ஐந்தாவது திருத்தச் சட்டம் (Fifth Amendment – முறையான நீதித்துறை நடைமுறை) ஆகியவற்றை ட்ரம்ப் நிர்வாகம் மீறியுள்ளதாகக் குறிப்பிட்டு இந்த மூன்று ஊடகங்களும் வாஷிங்டன் டி.சி மாவட்ட பெடரல் நீதிமன்றத்தில் மனு தாக்கல் செய்துள்ளன.
இந்தத் தடையை உடனடியாக நீக்கும் வகையிலும், ஊடகவியலாளர்களின் வெள்ளை மாளிகை நுழைவுரிமையை மீண்டும் வழங்கும் வகையிலும் நீதிமன்றம் அவசரத் தடை உத்தரவு (Injunction) பிறப்பிக்க வேண்டும் என்று மனுவில் வலியுறுத்தப்பட்டுள்ளது.
“அரசாங்கம் என்ன வெளியிட வேண்டும், என்ன வெளியிடக் கூடாது என்பதைத் தீர்மானிக்க முடியாது என்ற ஜனநாயகக் கொள்கையைக் காக்கவும், எங்களது பேச்சுரிமையைப் பாதுகாக்கவுமே இந்த வழக்கைத் தொடுத்துள்ளோம்” என்று அந்த ஊடகங்கள் வெளியிட்ட கூட்டறிக்கையில் தெரிவித்துள்ளன.
வெள்ளை மாளிகையின் செய்திகளைப் பதிவு செய்யும் ஏனைய முக்கியத் தொலைக்காட்சி நெட்வொர்க்குகளான ஏபிசி (ABC), சிபிஎஸ் (CBS), என்பிசி (NBC) மற்றும் ஃபாக்ஸ் நியூஸ் (Fox News) ஆகியவையும் இந்த விவகாரத்தில் சிஎன்என்-க்கு ஆதரவு தெரிவித்து வெள்ளை மாளிகையின் கூட்டு ஒளிப்பதிவுப் பணிகளை (TV Pool coverage) தற்காலிகமாகப் புறக்கணித்துள்ளன.