“கற்பகத்தரு” என்று போற்றப்படும் பனை மரங்களை வாழ்வாதாரமாகக் கொண்டு, நாட்டின் பொருளாதாரத்தை வளம்செழிக்கும் நோக்கில், பனை அபிவிருத்தி தொடர்பான விசேட உயர்மட்டக் கலந்துரையாடல் ஒன்று இன்று (23-06-2026) நாடாளுமன்றக் கட்டிடத் தொகுதியில் நடைபெற்றது.
பெருந்தோட்ட மற்றும் சமூக உட்கட்டமைப்பு வசதிகள் அமைச்சின் கீழ் இயங்கும் பனை அபிவிருத்தி அதிகார சபையின் எதிர்காலத் திட்டங்கள், பனை சார்ந்த உற்பத்திகள் மற்றும் அவற்றின் தரம், சந்தைப்படுத்தல் வாய்ப்புகளை மேம்படுத்துவது குறித்து இதன்போது விரிவாக ஆராயப்பட்டது.
அமைச்சர்கள் தலைமையில் முக்கிய ஆலோசனைகள்
பெருந்தோட்ட மற்றும் சமூக உட்கட்டமைப்பு வசதிகள் அமைச்சர் சமந்த வித்யாரத்ன மற்றும் பிரதி அமைச்சர் சுந்தரலிங்கம் பிரதீப் ஆகியோரின் கூட்டுத் தலைமையில் இக்கலந்துரையாடல் முன்னெடுக்கப்பட்டது.
இதன்போது, பனைசார் உற்பத்திகளை நவீன தொழில்நுட்பத்தைப் பயன்படுத்தி உலகளாவிய ரீதியில் கொண்டு செல்வது மற்றும் வட, கிழக்கு உள்ளிட்ட பனை வளத்தைக் கொண்ட பிரதேசங்களில் உள்ள மக்களின் வாழ்வாதாரத்தை உயர்த்துவது குறித்தும் கலந்துரையாடப்பட்டது.
அரச அதிகாரிகளின் பங்களிப்பு
இவ்விசேட கூட்டத்தில் கடற்றொழில், நீரியல் வளங்கள் மற்றும் கடல் வளங்கள் அமைச்சர் இராமலிங்கம் சந்திரசேகர், நாடாளுமன்ற உறுப்பினர் இளங்குமரன் ஆகியோருடன் பனை அபிவிருத்தி அதிகார சபையின் தலைவர் உள்ளிட்ட முக்கிய உயர் அதிகாரிகளும், சம்பந்தப்பட்ட அமைச்சுகளின் அரச அதிகாரிகளும் கலந்துகொண்டனர்.
சுபிட்சமான தேசத்தைக் கட்டியெழுப்புவதில் பனை வளத்தின் பங்களிப்பை அதிகப்படுத்துவதே இத்திட்டங்களின் முக்கிய நோக்கமாகும் என அதிகாரிகள் இதன்போது சுட்டிக்காட்டினர்.
