மத்திய கிழக்கில் நிலவும் போர் சூழல் காரணமாக உலகச் சந்தையில் எரிபொருள் விலைகள் பெருமளவில் அதிகரித்துள்ள போதிலும், இலங்கையில் உலகச் சந்தையுடன் ஒப்பிடுகையில் மிகவும் குறைந்த விலையிலேயே எரிபொருள் விற்பனை செய்யப்பட்டு வருவதாக அமைச்சர் அனுர கருணாதிலக தெரிவித்துள்ளார்.
கொழும்பில் இன்றைய தினம் (14) நடைபெற்ற நிகழ்வொன்றின் பின்னர் ஊடகங்களுக்குக் கருத்துத் தெரிவித்த அவர், தற்போதைய சந்தை விலையில் தொடர்ந்து எரிபொருளை விநியோகிக்க முடியாது எனச் சில தனியார் எரிபொருள் விநியோக நிறுவனங்கள் தெரிவித்துள்ளதாகக் குறிப்பிட்டார்.
குறித்த நிறுவனங்கள் தமக்கு லீட்டருக்கு ரூ. 140 முதல் ரூ. 160 வரை நஷ்டம் ஏற்படுவதாகச் சுட்டிக்காட்டியுள்ள போதிலும், இது தொடர்பில் அரசு இன்னும் எந்தவொரு இறுதி முடிவையும் எட்டவில்லை என அவர் தெளிவுபடுத்தினார்.
எரிபொருள் சந்தையைத் தனியார் நிறுவனங்களுக்குத் திறந்துவிட்டதன் முதன்மை நோக்கமே போட்டித் தன்மையை உருவாக்கி நுகர்வோருக்கு நியாயமான விலையில் எரிபொருளை வழங்குவதாகும் எனக் குறிப்பிட்ட அமைச்சர், நுகர்வோரின் நலனைப் பாதுகாப்பதே அரசின் முக்கிய முன்னுரிமை என்றார்.
தற்போதைய நெருக்கடிக்குத் தீர்வாக, கடந்த மே மற்றும் ஏப்ரல் மாதங்களில் டீசலுக்கு ரூ. 100 மற்றும் பெட்ரோலுக்கு ரூ. 20 என அரசு நிவாரணம் வழங்கியதைப் போலத் தொடர்ந்து நிவாரணம் வழங்குவது அல்லது தனியார் நிறுவனங்களுக்கு விலை எல்லைகளை நிர்ணயித்து அதன்கீழ் செயற்பட அனுமதிப்பது போன்ற பல்வேறு சாத்தியக்கூறுகள் பரிசீலிக்கப்பட்டு வருகின்றன.
நுகர்வோரின் சுமையையும், விநியோக நிறுவனங்களின் சிக்கல்களையும் கவனத்தில் கொண்டு, விரிவான கலந்துரையாடல்களுக்குப் பிறகு அரசு விரைவில் உரிய முடிவை எடுக்கும் என்றும் அவர் மேலும் தெரிவித்தார்.